Kronikë Amerikane nr. 278 – SuperBowl XLIX preview

Shumë peripeci na kanë ndjekur pas finaleve të konferencave në lidhje me Patriots. Gjithashtu është nevojitur kohë e gjatë për të tajitur atë që ndodhi në Seattle. Kur të kujtojmë këto dy fakte na kthehen dyshimet nëse këto dy ekipe janë me mëritë aty ku janë.

Seattle fitoi lojën e humbur të Packers. Ishte lojtari i 12të i vendasve – shikuesit që kontribuuan mjaftueshëm në aspektin psikik të mysafirëve, dhe fati i Wilson i cili rrezikonte seriozisht Andy Dalton për rejtingun më të ultë të dekadës së fundit.

Në Foxborough edhe një herë doli në pah kultura mashtruese, hajdute e Patriots dhe treshes së tyre – Kraft, Belichick, dhe Brady. Nuk di ku e kanë parë nevojën që të shfryjnë topat kundër Colts-ave të cilët i kanë dominuar vazhdimisht këto katër viteve të fundit. Por, shfryrja kundër Ravens është ajo që na rifreskon kujtesën për të njollosur edhe një herë e përgjithmonë Patriots. Mund të jenë ndoshta dinasti e 15 viteve të fundit, por gjithnjë do të kenë njollat e shumta, gjithnjë do të jetë i pranishëm ai * tek sukseset e tyre.

Deflategate

Shumë gjëra kanë dal në pah që veçse janë ditur, miqësia e Kraft me Goodell, që e bën atë si nënkomisioner, kultura e tyre vjedhëse, dhe mbi të gjitha gënjeshtrat e pastra si loti të Bradyt në konferencën e parë të tij për shtyp. Tani hetimet përqendrohen tek kujdestari i topave. Nëse dikush provon të na bind që një kujdestar i thjeshtë kryenëveti ka shfry topat, duhet të jetë një qeveritar i yni që provon të shes pallavra që vetëm një pjesë e popullit tonë do ti hanin. Krejt kjo punë është e orkestruar, të gjithë kanë ditur për këtë, edhe pse Belichik dukej bindëse në konferencën e parë. E tani Kraft kërkon ti kërkohet ndjesë Patriots – ekipit që ka spiunuara të tjerët. Të lutem!

SuperBowl XLIX

Do të jetë ndeshje e ngushtë. Çdo SuperBowl i Patriots ka përfunduar me më pak se 10 pikë diferencë, qoftë pozitive apo negative. Së paku e dimë që topat do të jenë të kontrolluar. Fitorja e Patriots ndaj Colts është më e lehtë se ndaj Bills, apo edhe Jaguars. Belichik do ta çmend Paganon, i cili nuk e ka idenë si të ndal Pats. Nuk duhet të merret parasysh ajo fitore për të favorizuar Pats. Kundër Ravens kanë vuajtur, dhe mund të vuajnë përsëri kundër Seattle, ngjashëm.

Por, edhe Seattle nuk është në formën më të mirë. Kundër Packers ishin fatlum. Mbrojtja e tyre ishte e mirë me Panthers, mirëpo ata ishin Panthers. Divizioni i tyre ka qenë katastrofal këtë vit, dhe nuk kanë pasur ku të matin forcat siç duhet.

Është e pamundur të veçoj njërën apo tjetrën si favoirt. Kjo e bën ndeshjen më interesante. Të dyja ekipet kanë rikthyer rezultatin në pjesët e dyta këtë vit, dhe atë në përfundimtare, prandaj nuk mund të rehatohen nëse marrin një epërsi 14+ pikëshe në pjesën e parë.

Pres një ndeshje të baraspeshuar, interesante, ku do të kemi një sulm të mirë kundër një mbrojtje të mirë, dhe një sulm mesatar kundër një mbrojtjeje mesatare. Pra, aksionet e Pats besoj që do të jenë më interesante.

Seahawks janë zgjedhja ime. Zgjedhja më e merituar, më morale për një unazë shtesë.

Luan Morina

Kronikë Amerikane nr. 277 – Finalet

Seahawks – Packers

Kampionët aktual kanë formë të mirë në ndeshjet e fundit, megjithatë vetëm shikoni emrat e ekipeve që kanë mposhtur në javët e fundit. Asnjëri nuk ka qenë ekip i denjë për ti shkaktuar probleme. Tani, radha është për kockën e parë të vështirë – Packers.

Packers janë të dobësuar me shëndetin e Rodgers. Por, nëse arrin linja ofanzive të ngadalësojnë mbrojtjen ballore të Seahawks, duke i mundësuar Rodgers pasime më të lehtë nga xhepi, atëherë mund të kenë shans të mirë. Gjithashtu duhet të aktivizohet edhe Lacy, i cili nuk ka dëshpëruar javëve të fundit. Megjithatë sekondarja e Seahawks është treguar e fuqishme kundër Panthers, si zakonisht. Panthers kanë pasur edhe një mbrojtje të mirë, por akoma ishin të papërgatitur dhe vinin nga divizioni më i dobët në ligë.

Seahawks edhe njëherë do të bazohen në mbrojtjen. Nuk besoj që do ta kenë lehtë si në fillim të sezonit. Kanë humbur Percy Harvin, por kanë fundor ofanziv të mirë, Willson për shembull, e edhe Lynch nuk është larg forme. Janë favorit për shumë arsye, megjithatë unë do të shkoj me Packers nga kjo finale.

Patriots – Colts

Punë e kryer. Patriots kalojnë për shumë arsye. Mund të urrejmë Bellchikun për gjithë historinë e tij kontroverse, por javën e kaluar kundër Ravens u pa aftësia e tij. Nuk mund të kontestojmë se është një nga mendjet më të mira në ligë, në mos më e mira. Edhe Tom Brady duket i nxehur, i inatosur, gjë që mund vetëm të konvertohet në rezultat pozitiv.

Colts mposhtën Broncos dhe Manningun, por 18shi nuk ishte në formë dhe plotësisht i shëndetshëm javëve të fundit. Sulmi depërtues është katastrofal, derisa mbuylimi i TY Hilton do të detyron Luck të provoj pasime të shkurtra tek fundorët ofanziv dhe Nicks ndoshta. Wayne është plakur, Moncrief është i ri. Mbrojtja nuk është e zoja për të ndalur Bradyn dhe kompaninë. Sidomos nëse aktivizohet Gray apo Blount, të dy emra terrorizues për Colts vitin e kaluar. Patriots presin Packers në SuperBowl.

Kronikë Amerikane nr. 276 – Fundi i Manning-Brady?

Para se të vazhdojmë me parashikimin e ndeshjeve divizionale të përfundimtarëve të hedhim një sy mbrapa

Pse humbën?

Bengals – Papjekuria dhe mungesat në sulm ishin fajtor kryesor për mungesën e fitores në përfundimtare për Cincinnatin tashmë dy dekada e gjysmë. Mund të fajësojmë trajnerin që kurrë nuk ka fituar në përfundimtare, mund të fajësojmë Daltonin, mund të fajësojmë fatin. Por, thjesht Colts u treguan më të mirë, edhe pse jo dominues sikur në pjesën e rregullt të sezonit. Dalton u tregua më i pjekur se sa dy herët e kaluara në përfundimtare, por përsëri është i mbipaguar.

Steelers – Mungesa e Bell ishte fajtori kryesor për humbjen e Steelers. Por, kanë pasur shumë alternativa tjera për të fituar, ama zor të mposhtet ajo mbrojtje e Ravens. Antonio Brown ishte për mrekulli i mbuluar, derisa linja ofanzive nuk mund ti përballonte asaj defanzive të Ravens.

Cardinals – Mungesa e Kuarterbekut ishte faji kryesor. Por, as Carson Palmer nuk më mbush sy për 

këta Cardinals që kanë një mbrojtje sekondare të shkëlqyeshme. Bruce Arians po bën mrekulli me këtë ekip tashmë dy vjet, dhe me një draft të mirë ndoshta mund të rikthehen në përfundimtare vitin e ardhshëm.

Lions – Referët! Thjesht referët ishin fajtorët kryesor pse Lions janë jashtë sot, por edhe Lions kanë mundur të bëjnë më shumë. I kanë pasur të gjitha kushtet, por thjesht nuk ia dolën. Pa Suh mund ta kenë më të vështirë, por jo të pamundur të kthehen në përfundimtare vitin e ardhshëm, sidomos kur kemi parasysh Bears dhe Vikings dhe dobësitë e tyre.

Pse do të fitojnë?

Patriots - Ravens

Ka më shumë se tre muaj që mediat nuk kanë shqyrtuar mundësinë e Patriots për humbje. Por, kujtimet për Ravens dhe mbrojtjen e tyre nuk janë të venitura. Të gjithë e dimë cilësinë e linjës defanzive, por sekondarja dhe aftësia e tyre për të mbuluar Brownin javën e kaluar të tmerrojnë. Patriots do të duhej të përqendrohen në Tom Bradyn dhe aftësitë e tij për të bërë mrekullia. Do të preferoja Ravens para Patriots, gjithnjë me shpresën që Colts do të mposhtin Broncos. Një gjë e tillë do të ishte dhe fundi për epokën e Bradyt dhe Manningut. Sidomos ky i fundit, lojtari im i preferuar i të gjitha kohërave duket se ka kaluar moti kohë zenitin dhe është në rënie të lirë.

Broncos – Colts

Dështimet kundër mbrojtjes së Ravens dhe në Superbowlin e kaluar më bëjnë të shqyrtoj në aftësitë aktuale të Manning. Mbrojtja e Broncos gjatë tërë sezonit ka qenë nën pritjet, përkundër nënshkrimeve në Free Agency. Julius Thomas nuk është në formën e vitit të kaluar, nuk kanë lojë depërtuese. Në anën tjetër Colts kanë qenë katastrofik në pjesën e dytë të sezonit. Mbrojtja është më e mirë se vitin e kaluar, por nuk janë akoma të pjekur për të arritur më shumë. Luck mund të bart ekipin si asnjë tjetër kuarterbek në ligë për momentin pos Aaron Rodgers. Por, nganjëherë duhet më shumë se Luck. Wayne është plakur, TY Hilton disi e lëshon topin gjithnjë në përfundimtare, derisa depërtimi është joekzistent. Do të doja të fitonin Colts, por megjithatë besoj që do të shohim edhe një finale të fundit ndërmjet Brady dhe Manning në AFC. Edhe pse ky duel më ka filluar të bëhet bajat. Pra, zgjedhja përfundimtare (me dëshirën për të qenë i gabuar) janë Patriots dhe Broncos.

Packers – Cowboys

Green Bay pa Aaron Rodgers do ta ketë të vështirë. Edhe pse është pothuajse e sigurt paraqitja e tij, nëse nuk është në formën më të mirë, do të ketë nevojë për ndihmën e mbrojtjes. Kushtet për sulm janë të gjitha, Cobb, Nelson, dhe Eddie Lacy. Ky i fundit duhet të jap performancën e karrierës për ti mundësuar Packers fitoren ndaj Cowboys.

E Dallas ishte afër përsëritjes së historisë në përfundimtare. Ngjashëm si Packers, edhe Cowboys kanë të gjitha parakushtet për fitore, plus referat.

Do të jetë interesante të shohim se kush do të humb serinë perfekte të fitoreve si vendas – Packers, dhe të fitoreve si mysafirë – Cowboys. Unë shkoj me Packers.

Seahawks – Panthers

Seahawks fitojnë, thjeshtë dhe pastër. Cam Newton nuk është gati, dhe kurrë nuk do të jetë të mposht një ekip si Seattle në një stadium si të tyrin. Seahawks në finale të NFC.

Pak filozofi...

Nëse fitojnë këto që parashikova unë, do të kemi finale të shkëlqyeshme, nëse jo, atëherë në finale kam Ravens – Cowboys. Si? Nëse dikush do të mposhtet këtë javë nga ato që i zgjodha si fitues (Patriots, Broncos, Packers, Seahawks), atëherë gjasat më të mëdha janë që Ravens dhe Cowboys do të dalin fitues në duelet e tyre. Ravens kundër Broncos janë më të mirë, falë mbrojtjes, derisa Cowboys nuk i kanë frikën Seahawks. Kështu që Superbowl del të jetë Ravens – Cowboys, një ndeshje për të cilën s’do të prishja gjumin :D 

Kronikë Amerikane nr. 275 - Para NFL Wild Card fundjavës

Kronikë Amerikane nr. 275

Para NFL Wild Card fundjavës

Panthers vs Cardinals

Edhe po të kishin Carson Palmer, nuk besoj që do të sillte Lombardin në Arizona për Cardinals, por sigurisht do të ishte më ndryshe se nga ai që kanë tani, kuarterbekun emrin e të cilit as nuk e kam mësuar përmendsh. Cardinals nuk e kanë edhe depërtimin e mirë, derisa nëse nuk ke kuarterbek të suksesshme nuk mund të bazohesh shumë as në pranim. Më vjen shumë keq për Arians, pasi sikur vitin e kaluar edhe sivjet, Arizona Cardinals bazohen kryesisht tek mençuria e trajnerit, i cili meriton edhe këtë vit shpërblimin për më të mirin, por përfundimtaret do të duhet të përfundonin qysh në rrethi ne parë. Vetëm mbrojtja nuk mjafton.

E nëse mbrojtja e Carolina Panthers do të hedh një hap para, të kthehet në formën e vitit të kaluar, kjo ndeshje mund të përfundoj qysh në çerekun e parë. Cam Newton do ta ketë vështirë kundër mbrojtjes së Cardinals, dhe nëse kap ritmin, atëherë nuk do ta ketë të vështirë të dominoj kundër një ekipi pa sulm. Panthers kanë edhe depërtimin e mirë me tre emra me përvojë në NFL.

Përzgjedhja ime - Panthers

Steelers vs Ravens

Ndeshje shumë më interesant pres në përballjen e rivalëve të Veriut në AFC. Pittsburgh kanë përparësi me Ben Roethlisberger dhe Antonio Brown e pakapshëm. Sekondarja e Ravens është inekzistente, derisa edhe Flacco ka qenë i përgjumur për pjesën më të madhe të sezonit. Pittsburgh kanë treguar dhëmbët si vendas dhe kanë gjetur një formë të mirë në pjesën e dytë të sezonit.

Mungesa e Bell mund të jetë hendikep i madh për vendasit, por kanë Brown, dhe një mbrojtje solide. Linja defanzive e Ravens është plusi më i madh që mund të kenë në këtë përballje, por s’do të mjaftoj për kalim në rrethin e dytë të përfundimtareve.

Përzgjedhja ime – Steelers

Colts vs Bengals

Pas nisjes së tmerrshme, por jo të papritur kundër Denver dhe Philadelphia, Colts-at e mi e kishin gjetur veten, para se ta humbnin përsëri, si zakonisht kundër Patriots.

Lëndimi i Bradshaw nuk është i vetmi fajtor për formën e dobët në pjesën e dytë të sezonit. Luck bën shumë gabime, dhe nga një formë MVP ka rënë në një kuarterbek mesatar në javët e fundit, Herron shfrytëzohet më shumë se T-Rich në depërtim, derisa nëse mbrojtja mbulon TY Hilton, Colts kanë mbaruar. Wayne është plakur, Nicks nuk shfrytëzohet sa duhet, derisa Moncrief akoma është i papërvojë. Mbrojtja, sidomos sekondarja është treguar shumë më e mirë se vitin e kaluar, por kanë pësuar disa debakle këtë sezon, sidomos ndaj ekipeve konkurrente në përfundimtare.

Rrethi i parë mund të jetë i kalueshëm për shkak se Bengals kanë humbur ndeshjen e sezonit të rregullt, dhe atë pa asnjë pikë të shënuar. Nëse mbrojtja arrin ti jap hapësirë Luck, dhe nëse ky nuk nis ndeshjen me 3andOut në dy-tri posedimet e para, Colts kanë shanse. Por, pastaj i presin ose Broncos, ose Patriots (personalisht do të preferoja Patriots), që do të thoshte eliminim.

Në anën tjetër Dalton duhet të dëshmoj veten se meriton të gjithë ato para. Bengals janë në formën më të mirë të viteve të fundit. Kanë ofanzivë të mirë, dhe defanzivë solide. Ju duhet të tregojnë veten në ‘Lucas Oil’ për të dëshmuar se janë të pjekur për përfunidmtare.

Përzgjedhja ime – Colts

Cowboys vs Lions

Ndeshja më e mirë rrethit të parë, për mendimin tim. Shumica i shohin Cowboys gati për fitore në përfundimtare, dhe pse jo edhe Superbowl. Parakushtet janë – Romo nuk po bën gabime amatoreske, nuk po ngulfatet në çerekun e katërt, DeMarco Murray ka formën e karrierës, derisa edhe Dez Bryant është ndër më të mirët në pranim.

Do të jetë interesante të shohim se si do të mund mbrojtja e Lions të mbuloj Bryant-in. Por, mos të harrojmë që shumë lehtë edhe Witten edhe Williams mund të shfaqen në skenë. Edhe linja defanzive e Lions nuk është për tu nënçmuar, sidomos me largimin e dënimit të Suh.

Stafford është shndërruar në një pasues të pjekur viteve të fundit. Sivjet pos Calvin Johnson – Megatronit, ka edhe Golden Tate. Edhe depërtimi me Bush e Bell nuk është i keq. Caldwell ka bërë një revolucion tek këta Lions, të cilët mund ti shkaktoj kokëçarje Cowboys-ave.

Edhe Dallas Cowboys kanë mbrojtje të mirë. E nëse e fitojnë këtë ndeshje atëherë pres të shkojnë deri në fund, së paku në NFC. Janë ekipi i vetëm që mund të mposht Seattle si mysafir, e pse jo edhe Packers-at e Rodgers.

Përzgjedhja ime – Cowboys (edhe pse zemra më shkon me Lions)